ريفين الزقازيق تتعدي علي أحد العملاء بالسب والضرب
في البداية لمن لا يعلم ما هي ريفين: ريفين هي ماركة مصرية تعد الآن واحدة من أشهر متاجر الملابس في مصر، بالرغم أنها تأسست منذ وقت قليل في عام 2004.
وتمكنت شركة ريفين من صنع اسم شهير لنفسها و قد توسعت الآن إلى أكثر من 20 فرعا في مصر بالإضافة إلى المكتب الرئيسي و فرعين آخرين في الصين.
نأتي الآن للواقعة التي حدثت في أحدي فروع ريفين في الشرقية الواقعة ينقلها لكم صديق أحد العملاء أحمد عبدالله الذي تعرض للضرب كما يظهر في أحد الفيديوهات المصورة من داخل فرع ريفين بالشرقية أثناء وقوع حادثة الاعتداء عليه.
تفاصيل تعدي ريفين علي أحد العملاء بالشرقية
توجهت يوم السبت 23/4 لفرع ريفين الزقازيق لاستبدال تيشرتات كنت اشتريتها من 10 أيام ومعايا الفاتورة، جبت القطع اللي هأستبدل بيها وواقف عند الكاشير منتظر دوري وكله تمام، مدير الفرع شافني إني هأستبدل لقيته جايلي بيقولي خير قلتله هأستبدل القطع ده قال لي وإنت مكنتش قيستهم قبل ما تاخدهم يعني فاستغربت تصرفه وقلتله أنا من حقي أستبدل خلال 14 يوم إيه المشكلة.
أخد التيشرتات بمنتهى العصبية وقلة الزوق وخبطني في كتفي وهو معدي وراح عشان يدخلهم على السيستم وعمال يقول ايه القرف ده فقلتله يا باشا اتكلم كويس أنا مش جاى أشحت منك، وسألته اسمك ايه قالي محمد شاكر.
وأنا مدير فرع ريفين الشرقية بقالي 8 سنين واتنطط براحتك ورزع التيشرتات وقال لي مفيش استبدال ليك وووريني هتعمل إيه، كان في حد من العملاء أنا معرفوش ولا يعرفني لما شاف أسلوبه معايا فتح موبايله وصور الواقعة وأول ما عرفوا إنه بيصور نتشوا منه الموبايل وتعدوا عليه وعليا بالضرب والشتيمة والسب.
وأخدوا موبايله طبعا ومقدرش ياخده غير بعد نصف ساعة كانوا بيحاولوا يفتحوه ويمسحوا الفيديو، طلعت بره الفرع أكلم النجدة فطلع مدير الفرع ورانا وفضل يتكلم بمنتهى قلة الأدب والسوقية وانتوا شحاتين ومد إيده عليا ضربني بالبوكس في وشي، جيت أدافع عن نفسي فوجئت باللي شغالين في الفرع كله.
شاهد أيضاً👈“الحقيقة الكاملة” لمقتل أمنية علاء أم التوأم ضحية حادثة الغسالة
تقريبا 6 طالعين يوجبوا مع المدير ويضربوا فينا أنا والشخص اللي صور بالإيد وبالرجل وإحنا على الأرض كإننا حيوانات ده غير موبايلي اللي اتكسر وطبعا بعدها النجدة وصلت وبعد ضغط من الناس والظابط نفسه قال هنروح القسم كلنا وممكن الطرفين يباتوا في الحجز وحرفيا الشارع كله كان بيضغط عليا.
ومكنتش مركز وقتها فالمحضر مكملش، اتصل بيا يوم الأحد 24/4 مدير منطقة في ريفين اسمه محمد يوسف وده طبعا بعد ما أنا بعتلهم الفيديوهات على الصفحة، وقالي إنه جاى فرع الزقازيق النهاردة يحقق في الواقعة وطلب يقعد معايا ويحل الموضوع وقالي ياريت تأجل أى إجراء لحد ما نقعد ونتكلم.
وبالفعل رحت قابلته يوم 25/4 تقديرا إنه كلمني وظنا مني إن الوضع ده متسمحش بيه الشركة وكان معاه حد من إدارة شركة ريفين، على حد قولهم اسمه أحمد حمدي وحد تاني معرفتش اسمه، وبعد ساعة من النقاش والتبرير والتهوين من المشكلة وعايز يلاقي أى وسيلة يطلعني مشترك في الغلط ومش عارف واضح انهم جايين، يغطوا على المشكلة ويبرروا اللي حصل مش أكتر ولقيت كل اللي في الفرع شغالين بصورة طبيعية محدش فيهم حتى اتوقف عن العمل.
وأنا كان ليا 3 مطالب: 1-محاسبة المدير واللي شغالين في الفرع حساب يليق بالجريمة اللي حصلت بجد ومش مجرد كلام.
2-اعتذار واضح وصريح من ريفين المسؤولة عن كل اللي حصل، في فرعها ومن موظفيها.
3-تعويض مادي عن كل اللي حصل والموبايل اللي اتكسر.
طبعا كان رده كالآتي: 1-المدير ممكن يتحاسب بس مش عشان اعتدى عليا لأ عشان معرفش يسيطر على الوضع، أما السيلز فمش هيتحاسبوا لإن دول صغيرين وعقليتهم زى ما إنت شايف رغم إنهم كلهم تعليم عالي خريجين آداب وتجارة، وريفين اللي مختارينهم ومشغلينهم، وقال مفيش حاجة تدينهم مجرد مشادة بس وحصل خير فمعرفش كان منتظر يحصل إيه أكتر من كده!
2-ريفين مش هتعتذر لحد، المدير اللي هيعتذرلك بس ولكن ريفين ملهاش علاقة بالموضوع.
3-الكلام ده لو إنت في الإمارات أو خارج مصر لكن مصر مفيهش الكلام ده، طبعا أنا رفضت كلامهم واتغيرت النبرة بعد الذوق للتهديد وإحنا هنعمل كذا وممكن نقول عليك كذا والشخص التالت اللي كان معاهم بمنتهى العجرفة قال أنا عارفك هتتطلع تطلع وتنزل على بمبة.
شاهد أيضاَ👈لغز مقتل عبير عروس القليوبية.. «خطيبها قتلها يوم الحنة» عشان بيحب واحدة تانية
واتصل بيا حد بيقول إنه من الشؤون القانونية عندهم بيهددني وقفل الموبايل في وشي، وطبعا أنا غلطان إني وافقت أقابلهم من البداية لإن واضح إنه ميفرقش معاهم العميل ولا أى حاجة بس عايزين يحافظوا على مناصبهم وفهمت الموظفين جايبين البجاحة والبلطجة ده منين.
وكما قال الشاعر” إذا كان رب البيت بالدف ضاربا فشيمة أهل البيت كلهم الرقص”.
توجهت بعدها لقسم شرطة ثان الزقازيق بعد ما استأذنت الشهود اللي حضروا الواقعة انهم يشهدوا ووافقوا مشكورين، وحقيقي الظباط هناك كانوا محترمين ومتعاونين، وأثناء كتابته جه أ. محمد شاكر مدير فرع ريفين وأ. محمد يوسف مدير المنطقة للقسم عايزين يعملوا محضر قصاد المحضر زورا وبهتانا ووقتها كنا هندخل الحجز ونتعرض على النيابة صباحا، وممكن يتم التجديد 4 أيام، فآسفا اضطريت ألغيه، ومكنتش أتخيل إن الإدارة عندهم بالتواطئ والأسلوب الرخيص ده.
هم متخيلين إن بعد المحضر كده أنا خلصت اللي عندي بس فعلا في طرق تانية إني أجيب حقي وهيرجع إن شاء الله، وحقيقي عمري ما شفت محل محترم بيكلم العملاء بقلة الأدب ده ناهيك إنه يضربهم، والراجل الشهم اللي وقف جمبي برغم إنه مشافنيش قبل كده حابب أشكره جدا.
فيديو اعتداء ريفين علي أحد عملاءها
كانت هذه تفاصيل واقعة الاعتداء من قبل مدير فرع ريفين الزقازيق علي أحد العملاء والذي يدعي أحمد عبدالله، بعد انتشار الواقعة، تصدر هاشتاج ريفين بلطجية علي موقعي تويتر وفيسبوك للمطالبة بحق أحمد عبد الله العميل الذي تعرض للضرب في ريفين.
