الفيلم بيحكي عن طفل يتيم يُدعى “نور” عايش مع خالته وزوجها في قرية ريفية وبيعاني من الفقر ومن التنمر من زملائه ومدرسينه في المدرسة، وفي سبيل محاولة إكتسابه للإحترام من الجميع بيستغل نور الصدفة التي أدت لدخوله منزل مهجور.
يخافه الجميع أمام المدرسة لإعتقاهم وجود شبح بداخله – للتعبير عن شجاعته بعد إكتشافه إنه بيسكنه رجل عجوز عايش هناك مختبئاً من العالم، بتنشأ صداقة وعلاقة تربوية بين نور والرجل العجوز وبيخوضوا رحلة مع بعض لإستكشاف الذات ومواجهة المخاوف.
برا المنهج هو الفيلم الروائي الطويل رقم 6 للمخرج عمرو سلامة، وإلى حد ما شوية فيلم “لامؤاخذة” هو أقرب الأفلام شبهاً بفيلمنا، كلا الفيلمين من بطولة طفل صغير كل منهما بيواجه مشكلة بيحاول التغلب عليها، بنشوف إستخدام للتعليق الصوتي على بعض الأحداث لكن مش بشكل مكثف زي فيلم لامؤاخذة، كمان بنشوف مشاهد كثير بيتم تصويرها في مدرسة بين الطلاب، وبنشوف برضو مرور لبعض ضيوف الشرف من خلال الأحداث ويمكن دي أبرز ملامح الشبه بين الفيلمين لكن الأهم إننا بنشوف تطور كبير على مستوى الصناعة بين الفيلمين.
سيناريو الفيلم لعمرو سلامة وخالد دياب متماسك بشكل كبير، وإن كان إيقاعه كان محتاج يبقى مضبوط أكثر خصوصاً في الجزء الأول منه، الفيلم بينقل بعض الأفكار والرسائل طوال الأحداث بشكل سلس وإن كان فيها بعض المباشرة شوية إلى إن الأفكار دي بتتضافر في النهاية علشان توضح الرسالة الرئيسية للفيلم، الحوار كمان كان ثري وقريب من المشاهد.
الأداء التمثيلي في الفيلم كان جيد جداً في المجمل، “ماجد الكدواني” مميز كعادته وقدم لحظات تمثيلية رشيقة وجميلة، كمان الطفل “عمر شريف” كان هايل ولطيف جداً ويا ريت نشوفه في أعمال كثير بعد كده والأاء ده بيعكس قدرة عمر سلامة على التعامل مع الأطفال وإنه يطلع منهم شغل محترم جداً كون له تجارب سابقة مع الاطفال أغلبها كان مميز، كمان كان في مرور لطيف لروبي ودنيا ماهر، يمكن أحمد خالد صالح شوية كان محتاج يكون أفضل من كده، أحمد أمين وأسماء أبو اليزيد هم ضيوف شرف مش أكثر.
الفيلم كان فيه بعض لحظات الكوميديا اللطيفة، وتصويره كان كويس وكمان المونتاج إنما الجرافيك بقى فكان مقبول علشان كان في أفضل من كده بكثير كان ممكن تقديمه في رأيي.
الموسيقى التصويرية لراجح داوود حبيتها وهي من أفضل عناصر الفيلم بكل تأكيد بتمس المشاعر وبتدخلك في مود لطيف والأهم إنها تصلح للإستماع بشكل منفصل.
في المجمل فيلم برا المنهج هو تجربة لطيفة فيها أفكار تُحترم، وبيعجبني في أفلام عمرو سلامة إن بيبقى فيها جزء ذاتي كده بيكون قريب من الناس.
