recent
أحدث الأخبار

أسباب ارتفاع أسعار البيض والدواجن | ليه أسعار الدواجن والبيض ارتفعت؟ إيه الحل؟

الصفحة الرئيسية

أسباب ارتفاع أسعار البيض والدواجن | ليه أسعار الدواجن والبيض ارتفعت؟ إيه الحل؟

- خلال الشهر اللي فات زادت أسعار الدواجن والبيض بشكل كبير جدا في مصر، وده خلى في مصريين يتكلموا عن حملات مقاطعة للدواجن والبيض.

- موضوع زيادة أسعار البيض والدواجن هو شيء متكرر في مصر مش أول مرة يحصل، وبيحصل دايما معاه حديث عن حملات للمقاطعة، ورغم أهمية الحملات دي يمكن في توصيل رسالة، إلا أنها في الغالب مش بتنجح وده لأسباب مختلفة منها عدم التزام الجميع بها لأنه أمر مش سهل بالمرة.

- تقدروا تكتبوا لنا في التعليقات أسعار الدواجن والبيض وصلت عندكم لكام دلوقتي؟ وشايفين الأزمة إزاي أثرت عليكم.

ليه أسعار الدواجن والبيض ارتفعت؟

- خلال الشهر اللي فات ارتفع سعر كيلو الدواجن البيضاء بحوالي 10 جنيه وزاد سعر طبق البيض تقريبا 11 جنيه عشان يوصل في بعض المناطق بـ 60 جنيه.

- حاليا سعر كيلو الدواجن في المزرعة حوالي 28 جنيه -29 جنيه عشان يوصل للأسواق بحوالي 34 و35 جنيه، مقابل 25 جنيه في أول سبتمبر اللي فات.

- في حين سعر طبق البيض دلوقتي بمتوسط 52 جنيه بالأسواق باختلاف المناطق بعد ما كان 41 و 42 جنيه الشهر الماضي.

- وزارة الزراعة بتقول أنه ارتفاع سعر البيض سبببه قوى العرض والطلب في السوق، في طلب كتير حاليا لكن مفيش إنتاج كاف، وده فعلا ممكن يكون سبب مباشر خاصة أنه مع عودة السياحة المرتقبة يعني واللي بدأت تشتغل من المفترض أنه تطلب كثير من الدواجن والبيض.

- أيضا سبب كمان هو ارتفاع أسعار الأعلاف عالميا مش في مصر بس، بحسب نائب وزير الزراعة سعر الطن حاليا 8100 و8600 جنيهًا، مقابل 5800 جنيه السنة اللي فاتت.

- طبعا الارتفاع في سعر الأعلاف هيؤدي لارتفاع تكلفة الإنتاج وبالتالي رفع السعر، ولكن كمان وده المهم أنه هيطلع كثير من المنتجين بره السوق على المدى القصير، بالبلدي يعني مش هيعملوا دورات تربية جديدة لغاية ما أسعار الأعلاف تستقر، وده بدوره هيقلل المعروض في السوق ويرفع السعر.

- وبالنسبة لارتفاع البيض، هنلاقي إن أسعار معظم المنتجات الغذائية البديلة للبيض عالميا ومحليا وبالتالي البيض بيتأثر بالارتفاع بعد كثرة الطلب عليه لرخص سعره بالمقارنة بالمنتجات الغذائية التانية.

- طبعا ومع ارتفاع الأسعار التجار بيميلوا أنهم ياخدوا ربح أكثر من المعتاد، لأنه السلعة بقت أقل في السوق فبدل ما كان بيكسب 2 و3 جنيه في الكيلو يكون عايز يكسب 4 و 5 في الكيلو مثلا بالنسبة للفراخ.

- ببساطة اللي بيحصل حاليا ده بيتكرر كل فترة.

- سوق الدواجن في مصر كبير جدا، تقريبا بنتنج حوالي 1.6 مليار طائر سنويا بنسبة اكتفاء ذاتي حوالي 97 % ودي نسبة كويسة جدا، وفي البيض كمان عندنا اكتفاء ذاتي لأننا بننتج أكثر من 100% من احتياجاتنا السنوية.

- ولأنه البيض والدواجن أشياء مهمة على مائدة غذاء المصريين وفي ثقافتهم الغذائية لأنه بروتين رخيص نسبيا إذا قورن باللحوم الحمراء فالسوق كبير وبيتوسع بشكل جيد.

- بحسب تصريحات سابقة لوزير الزراعة تتضمن صناعة الدواجن استثمارات بحوالي 90 مليار جنيه وبتستوعب أكثر من 2.5 مليون عامل.

- أحد الحلول هو دفع القطاع الخاص لإنتاج الأعلاف محليا من خلال التوسع في زراعة الذرة الرفيعة أو حتى استيرادها خام من بره وإنتاج العلف هنا بالتالي تقل تكلفة العلف.

- حاجة تانية هو تطوير تكنولوجيا إنتاج الفراخ والبيض في مصر من خلال تكثيف الاستثمارات في البحث والتطوير ونقل الخبرات والتجارب من بره عشان نقلل تكلفة الإنتاج.

- الاهتمام بمنظومة الطب البيطري وخاصة في المزارع الصغيرة اللي في الغالب مش بيكون عندهم الإمكانيات المادية عشان يهتموا بالتطعيمات أو الثقافة البيطرية اللازمة للتعامل مع الدواجن وأمراضها الكتير.

- ممكن الحكومة تزود حزمة التيسيرات لإنشاء مزارع الدواجن البياضة ومنح الراغبين قروض ميسرة بفوائد بسيطة لإنشاء مزارعهم.

- الجزء الأخير هو رقابة مستمرة على الأسعار، وتفعيل دور المجمعات الاستهلاكية التابعة لوزارة التموين واللي بتبيع بأسعار أقل، وبالتالي تكون قادرة بشكل غير مباشر على كبح التضخم في أسعار الدواجن والبيض اللي بيتكرر كتير جدا.

- وكمان إحنا مش مع التفكير في فتح باب الاستيراد لأنه دا هيضر بالصناعة دي كلها، بالعكس لما يحصل أزمة يمكن يكون فيه رقابة على التصدير لحين ما نعدي الأزمة ونحاول نعالج جذورها.

- السلع المهمة على سلة غذاء المصريين زي الخبز والبيض ومنتجات الألبان والدجاج لازم يكون عليها رقابة حكومية، مش بنقول أننا نفرض تسعيرة جبرية لكن الحكومة يكون عندها من الإمكانات اللي تكبح به الزيادات الموسمية في أسعار السلع دي، وطبعا الموضوع متعلق أكبر بحل المشكلات اللي بتكون أساس في الارتفاع دا، لكن ميصحش استغلال الناس في وقت الأزمة.

- وده لأنها سلع مهمة فهي بتستهلك جزء كبير من دخل المصريين، المواطن المصري العادي اللي عنده أسره من 4 أفراد بس (على الأقل) لازم يستهلك 4 فراخ في الشهر، يعني 8 كيلو على الأقل لو هيتسهلك بس فرخة في الأسبوع، بالتالي هو مطالب يدفع قد ايه لدا، ولو هيستهلك بيض كمان لأسرته في الشهر هيدفع قد ايه؟

google-playkhamsatmostaqltradent