منتخب مصر يخطف تعادل بشق الأنفس أمام الجابون 1-1..تحليل المباراة التي لا علاقة لها بكرة القدم

الحقيقة المباراة مش محتاجه تحليل فنى لأن اللى شفناه النهارده وشفناه أيضا فى المباراة الأولى أمام أنجولا ليس له علاقه بكرة القدم .

نحكى الطبيخ من الأول الاخ بدريولا بالاتفاق مع اتحاد الكرة والمدير الفنى لاتحاد الكرة رفضوا خوض اى مباريات ودية فى فترة التوقف الدولى على عكس كل منتخبات العالم والحقيقة مش فاهم ده ثقة بالنفس ولا غرور وكبر وعناد وهى صفات متواجده فى شخصية بدريولا فكان الطبيخ حامض زى ما احنا شفنا بالظبط.
نيجى بقى لتانى طبخة حمضانه طبخها بدريولا وهى الاختيارات.
هنلاقى ماشاء الله اختيارات بديعة ليس لها مجال من الاعراب فعلى سبيل المثال اختيار لاعيبة بيراميدز وكأنه بيكافئ إدارة بيراميدز على الفترة اللى قضاها معاهم والكام مليون اللى قبضهم هناك .
فضم لاعبين Expired كرويا زى عبدالله السعيد صاحب ال ٣٦ عام وأحمد توفيق اللى مش بيشارك اساسا مع بيراميدز وبيكون بديل وعمر جابر اللى تسبب فى خسارة بيراميدز ٣ مباريات على التوالى بأخطاء ساذجه ورمضان صبحى اللى ساب فريقه وقعد فى الساحل ومكنش بيتمرن ورجع على اخر مباراة لبيراميدز فى الدورى وعلى جبر اللى ضمه لمجرد أنه لعب كاس عالم مع المنتخب.
وده مش معناه انى رافض فكرة أنه يضم لاعبين من بيراميدز بالعكس كان فيه ابراهيم عادل يستحق التواجد ومحمد حمدى يستحق التواجد ولاعبين آخرين كانوا يستحقوا التواجد مثل عمر مرموش اللى انضم لشتوتجارت وأحمد عبدالقادر اللى مقدم موسم رائع وخير بديل لقفشه وأحمد ياسر ريان ثانى هداف الدورى .

بالنسبة للطبخة الثالثة الأكثر حموضه أقصد طبعا العك الكروى اللى حصل:-
١- أخطاء اختيار التشكيل وطريقة اللعب أخطاء مستحيل يعملها مدرب فى قطاع من قطاعات الناشئين فى أى نادى و محو الشخصية والهوية الكروية للفريق وجعل المنتخب مستباح حتى من المنتخبات اللى مسمعناش عنها حتى فى طبق اليوم بما اننا بنتكلم عن طبيخ مش مباراة .
٢- بدريولا بدأ المباراة بطريقه 3-3-4 بتغيير عنصرين فى خط الدفاع وده اول خطأ عمله ومش فاهم ايه وجهة النظر بالبدء بأحمد توفيق على حساب باهر وأيمن على حساب فتوح وده أفقد الخط الخلفى التوازن والانسجام اللى هو اصلا مش موجود .
٣- بدريولا لعب بثلاثة فى نص الملعب ليس فيهم طارق حامد وده علامة استفهام انك تبدأ بطارق فى مباراة انجولا على ارضك وعايز تكسب وخارج الأرض تريحه .
٤- لازم بدريولا يفهم أن التأمين الدفاعى بالكيف وليس بالكم يعنى مش لازم العب ب ٣ فى نص الملعب عشان أمن دفاعى الموضوع خاص بالتوظيف وطريقه الضغط والتمركز الجيد والرقابة الصحيحة بدليل أن الجابون كانت أكثر استحواذ واحنا بنلعب ب ٣ فى نص الملعب .
٥- لو هلعب ب ٣ فى نص الملعب يبقى لازم الثلاثى الامامى يمتازوا بالسرعه وده موجود عند شريف وصلاح ومش موجود عند قفشه اللى بيفقد أكثر من نص قوته لو لعب جناح .
٦ – انت جربت الطريقه والتشكيل ده فى الشوط الأول ومكنش لينا اى شكل هجومى ودفاعيا الشناوى انقذك مرتين يبقى الطبيعى انك تنزل الشوط الثانى تغير من الطريقه والتكتيك ده لو انت فعلا زى ما بتقول بتلعب على الفوز .
٧- اللى حصل الشوط الثانى بيوضح أد ايه انت عكاك عنيد متعصب لرأيك وفكرك الملئ بالعشوائية وبالحب والكره .
٨ – دخل بدريولا الشوط الثانى بنفس عك الشوط الأول وبردو مكنش لينا اى تواجد هجومى برغم وجود هداف الدورى المصرى و وجود واحد من أفضل لاعبى العالم وده لانك مقدرتش تخلق ليهم المساحات اللى يقدروا يشتغلوا فيها .
٩- طرد عمر جابر لا يتحمله عمر بل يتحمله بدريولا أين حنكة المدرب وقرائته للمشهد عندك لاعب لا يؤدى هجوميا ولا دفاعيا وجبهته مستباحه ومعاه إنذار وسايبه فى الملعب فالطرد ده بيوضح أد ايه انت ماعندكش بربع جنية حس كروى .
١٠- الدستور بيكفل ليك ٥ تغييرات يا مواطن ولعيبتك مش قادرة تقف على رجليها وتبدأ اول تغييراتك بعد الدقيقة ٧٠ ايه يا عم هو فى فتوى بتقول حرام التغيير بين الشوطين عندك لعيبه تقدر تغير شكل المباراة زى مصطفى فتحى اللى عنده حلول فردية ومصطفى محمد وصلاح محسن والشحات وزيزو .
وطبعا المفروض اننا نقتنع أن تغييراتك هى أحدثت الفارق وانك اخترت التوقيت الصح للتغييرات .
على فكرة واضح كمان أن المنتخب مستباح داخليا ماهو لما التشكيل بتاع المباراة يكون معروف قبل المباراة بيوم ونازل على كل المواقع والصفحات والفضائيات يبقى الباب مفتوح للجميع.
اللى ينقط واللى يغيظ أن المراسل بيسأله ليه قعدت طارق حامد يرد يقوله معلش ده أمور فنية مينفعش اجاوب عليها تقولش سر حربى ولا يكونش فاكر نفسه كيميائى وعالم وصاحب نظرية واحنا منعرفش .
وبالمناسبة وبعيدا عن كرة القدم حسام البدرى بيحب إسم بدريولا أوى.
Scroll to Top