الجامعات الأهليه المصريه الجديده:
1- هي جامعات حكوميه جديده غير هادفه للربح.. يعنى الطالب بيدفع مقابل التعليم الى بياخده بالضبط…يعنى لا بياخد تعليم مجانى مدعم زي الحكومى , ولا بيدفع تعليمه + المكسب زى الجامعات الخاصه…
2- جت منين فكره الجامعات الأهليه و ايه هدفها؟
التعليم الحكومى المجانى بشكل كبير بائس .. انا خريجه تعليم حكومى عشان لو حد هيدخل يقولى بتتنمرى… انا خريجه تعليم حكومى و بدرُس في جامعات خاصه, فا عارفه كويس اوى الفرق ..
فا الطالب لما بييجي يدخل جامعه و على فرض قدامه كل الاختيارات و جايب مجموع الكليه الى هو عايزها.. يا بيدخل حكومى من أجل قيمه اسم الجامعه و مجانيه التعليم و يفضل فى معاناه لحد التخرج, يا اما أهله بيدخلوه جامعه خاصه بفلوس كتير عشان يقعد فى مكان نضيف فى وسط اعداد طلبه قليله و تركيز أكتر معاه , و طبعا مع ناس كلها قريبه من بيئته.. يا اما لو الحال متيسر, ممكن الأهل يسفروا الولد او البنت بره يكملوا تعليمهم…
فا الحكومه فكرت.. احنا حاليا مش هنقدر نشيل الدعم من الجامعات الحكوميه, فا هنعملك جامعات حكوميه بفلوس بتقدملك خدمه و تعليم هننافس بيه الجامعات الخاصه و جامعات بره الأجنبيه و مش عايزين نكسب منها… و بالتالي الطالب بيدفع مصاريف معقوله بالمقارنه باسعار الجامعات الخاصه.
3- ايه هدفها؟
– تقديم خدمه تعليميه ممتازه.
– الارتقاء بالمستوى بتاع الخريجين.
– و بالتالى زياده البحث العلمى و ده بيرفع تصنيف الجامعات فى مصر و بالتالى التعليم العالى ككل.
-تطوير مستوى الخريج و انه مؤهل لسوق العمل بجد.. يعنى معاه مهارات العمل , مش بس العلم الى فى الكتب.
– الجامعات دى فيها تخصصات مش موجوده, بس البلد فى أشد الحاجه ليها, زي مثلا تخصص “الدراسات الصحراويه” فى جامعه الملك سلمان فرع الطور.
4- الجامعات الأهليه بتاخد كل طلبه ثانوي عام بجميع شهاداتهم المحليه و الدوليه, و بمجموع أقل من الحكومى بشويه.. يعنى الى كان نفسه فى طب مثلا و فرقت معاه على درجتين, ممكن يلحقها فى جامعه الجلاله مثلا.
5- هم أربع جامعات لحد دلوقتى.
– الجلاله- فى مدينه الجلاله.
– العالمين- فى العالمين
– الملك سلمان و لها 3 فروع, فى شرم الشيخ و الطور و راس سدر.
– المنصوره الجديده- المنصوره.
و هيتضاف ليهم جامعات أهليه جديده كل سنه
6- التقديم دلوقتى و انت بتمتحن و ايوه قبل ما تخلص و قبل ما نتيجتك تطلع طبعا.. هو نظام الجامعات الخاصه كده عشان بيتحدد التنسيق على هذا الاساس .. حسب المجاميع و ال waiting lists
و عوامل أخري…
بتدخل على موقع الجامعه و بتشوف طلبات كل كليه ايه, و وبعدين بتقدم و بتدفع فى حسابهم البنكي مقابل ال
admission
و تقدر طبعا تقدم على كذا تخصص فى كذا جامعه … لو مثلا هتقدم على طب الجلاله مثلا و بيو تكنولوجى الجلاله… بتدفع ادمشن اول رغبه 750 جنيه تمن الاختبار, و كل رغبه بعد كده 500 جنيه..
بتمتحن انجليزى و IQ
و تكنيكال بيبقي حسب التخصص..
و ان نجحت, بتتحط على قوائم الانتظار فى انتظار مجموعك فى الثانويه العامه او الشهاده المعادله.
ده طبيعي و معمول بيه فى كل العالم… و ممكن الاهل ساعات لزياده فرص أبنائهم بيقدموا فى كذا جامعه فى كذا تخصص .. و عشان كده احنا فى الجامعه بتفضل اسامى طلبه سنه أولى لحد اول ميد تيرم بعد ما السنه بتبدأ بيفضل فيه اسامى بتتشال من الليسته و تتحط..
7- للمغتربين… فىه بيوت طلبه طبعا dorms
ممكن تاخد سكن بشكل full time
او Part time
8- الجماعات الأهليه هتنافس بشراسه الفتره الجايه… على سبيل المثال, جامعه الجلاله كان عندهم زياره من جامعه اريزونا الأمريكيه لمناقشه سبل التعاون بين الجامعتين, و تناقشوا ان يبقي فىه دكاتره أمريكان هيبقوا بيدؤسوا فى الجلاله سواء بالحضور أو اونلاين. جامعه الجلاله هتبقي اول جامعه ذكيه فى مصر
First ever smart university in Egypt.
و هتبقي بتدي شهاده مصريه و شهاده أجنبيه DUAL Degree
زي الجامعات البريطانيه و الالمانيه و الفرنسيه… الخ
فى كل الكليات ما عدا كليه طب الجلاله.. و دى عملوا بالفعل بروتوكول تعاون مع طب الجيش المصري لاثراء العمليه التعليميه… بالمناسبه جامعه لجلاله فيها المستشفي التعليمي الخاص بها.
85% للطب و70% للهندسة و55% للإعلام.. الحد الأدنى لتنسيق الجامعات الأهلية.
جامعه اريزونا هى الحائزه على المركز الأول فى ترتيب الجامعات الأمريكيه مجال الابداع, و دوليا هى الجامعه رقم 155 فى ترتيب أفضل جامعات العالم.
9- جامعه الملك سلمان و الجلاله و العالمين دخلو الخدمه فى بعض التخصصات و اشتغلوا من السنه الللي فى فاتت . و السنه دى هتنضم ليهم جامعه المنصوره الجديده.
10- موقع الجامعات الأهليه على موقع المجلس الأعلى للجامعات موجود فى الكومنتس, دوس على اى جامعه منهم هيحولك على الموقع بتاعهم… كل جامعه على موقعها كاتبه كل التفاصيل و لو حاجه مش موجوده, فا تواصل معاهم على الايميل او صفحتهم على الفيسبوك , بيردوا على كل حاجه.
