طلب وكيل أعمال جونيور أجاي لاعب الأهلي من إدارة النادي الأهلي الحصول على قيمة الموسم المقبل كاملاً حتى يرحل اللاعب بشكل ودي بنهاية الموسم الجاري حيث يرتبط اللاعب بعقد مع الاهلي ينتهي بنهاية الموسم المقبل 2022.
ويأتي طلب وكيل جونيور أجاي بعدما أبلغه النادي بفسخ عقد اللاعب بنهاية الموسم الجاري بناءً على طلب الجهاز الفني للفريق بقيادة الجنوب إفريقي بيتسو موسيماني الذي رفض بقاء أجاي للموسم المقبل.
وظهر أجاي بشكل متراجع للغاية الموسم الجاري الأمر الذي جعل هناك إتفاق عام في النادي على رحيله بنهاية الموسم الجاري.
ويتفاوض مسئولو الأهلي حالياً مع أجاي ووكيل أعماله بشأن المبلغ الذي سيحصل عليه من أجل الرحيل بشكل ودي عن النادي دون تصعيد.
ويتقاضى أجاي مليون دولار في الموسم الواحد مع الأهلي أي ما يقرب من 16 مليون جنيه طالب بهما اللاعب للرحيل حالياً وهو ما يتفاوض الأهلي عليه من أجل تخفيضه.
رسالة وداع وحب من جمهور النادي الأهلي إلي النيجيري جونيور أجاي..
جاء وقت الوداع ، جاء وقت الرحيل يا صديقي ..
چونيور اولوافيمي اجاي ابرز من ارتدي القميص رقم (28) ..
انا عاوز اعترف واقول اني من ساعة رحيل ( ڤلاڤيو ) (جلبرتو) محبتش لاعب افريقي علي قدر حبي لـ ( جونيور اجاي ) (علي معلول)،
انا مش ناسي انه جه ف اغسطس 2016..
و مش ناسي اول هدف ليه واللي كان في الدوري وكان هدف التعادل في ( الاتحاد السكندري ) وخدها بعد استلامة علي الصدر وعلي الطاير قالها روحي وزغرطت ف الشبكة ..
وبعدها بيجري وبيلمح الحكم وهو بيشاور ع حاجة هو مفهمهاش وفكر ان الجول اتلغي ، وهو في حيرة وعمال يبص للحكم و لـ ( وليد سليمان ) وبيسأل جول ولا لا !! ..
مش ناسيله وجوده وتأثيره في المباريات الكُبري وبالذات في افريقيا وماتشات ( الزمالك ) ..
مين ينسي اهدافه في ( الزمالك ) وانه مسجل فيهم 5 اهداف ، مين ينسي ماتش الترجي في رادس ، مين ينسي ماتش الـ6/1 النجم الساحلي في القاهرة ، مين ينسي ماتش صن داونز في القاهرة وثنائياته هو و زميل الكفاح ( معلول ) ، مين ينسي الجملة الخالدة اللي اتولدت من الهدف الذهبي في النجم الساحلي ( التاسعة بتوقيت الاهلي وبأقدام اچاي ) ، وكانت التاسعة والعاشرة كمان ..
مين ينسي انه احسن واحد يعمل كنترول ع الكورة ولو راجل خود الكورة من اجاي وهي تحت رجله ، واتفرج عليه لما يكون مزاجه رايق والـ JA الله عليه ..
اجاي الوحيد اللي حير علماء الكورة والفيزياء والكيمياء والتكنولوچيا وعلوم المجرات الكونية, لاعب متفهملوش مستوي ، مرة يحسسك ان مفيش زيه في العالم ، ومرة يحسسك انه لعب كورة بالغلط وهو في الاصل عليه ديون في نيچيريا وجي يشتغل اي حاجة عشان يسدد اللي عليه ..
لكن الحقيقة الثابتة والواضحة ، ان اجاي مخذلناش في اللقاءات الكبيرة المُستعصية ، وحفر لنفسه ذكريات جوة قلوب كل اهلاوي هتفضل للأبد ، وهنعيش نفتكرها وكل ما نقابل في بعده هنفتكرها ..
اجاي هيتم في مباراة اسوان القادمة 100 مباراة مع الاهلي في الدوري وعمل مع الاهلي اجمالآ :
157 مباراة سجل فيهم 41 هدف وساهم بالمساعدة في حوالي اكتر من 40 هدف ..
اجاي بيرحل وهو سايب بصمة كبيرة جوة النادي الأهلي ، يمكن ظروف الاستغناء عن لاعب افريقي كان ليها دور كبير في رحيله ، كمان كان صعب يكمل وهو طموحه واقف عند مستوي معين مش بيتطور على الرغم من أن سنه صغير ..
احنا مش عرفين ايه اللي حصلك وليه مستواك بقا كدة مع ان لسة سنك صغير !! وكان نفسنا تفضل معانا ..
لكن للاسف يا صديقي مصلحة الاهلي اهم والاهلي فوق الجميع ..
هتوحشنا يا ابو خالد ونتمني نشوفك مكسر الدنيا في اي مكان تروحه ولينا لقاء تاني قريب ..
هتوحشنا يا نيچيري بيه..
